సంక్రాంతికి మెగా హిట్ ఖాయం: రాజేంద్ర ప్రసాద్

చాలా కాలం తరువాత చిరంజీవి 'వాల్తేరు వీరయ్య' సినిమాతో పక్కా మాస్ యాక్షన్ ఎంటర్టయినర్ చేస్తున్నారు. బాబీ దర్శకత్వం వహించిన ఈ సినిమా ప్రెస్ మీట్ కూడా ఘనంగా నిర్వహించారు. రవితేజ కీలకమైన పాత్రను పోషించిన ఈ సినిమాలో, రాజేంద్రప్రసాద్ ముఖ్యమైన పాత్రను పోషించారు. 

ఈ వేదికపై రాజేంద్ర ప్రసాద్ మాట్లాడుతూ .. " ఒక ప్రెస్ మీట్ ఇంత అద్భుతంగా ఉండటం ఎవరూ చూసుండరు. మెగా ఈవెంట్స్ అన్నీ కూడా మెగా వల్లనే అవుతాయి. ఈ కంటెంట్ వినగానే మెగా హిట్ తప్పదు అనే విషయం నాకు అర్థమైపోయింది. ఏయే పాత్రలను ఎవరెవరు వేయాలో వారే వేశారు. అందువల్లనే ఇది ఒక అద్భుతమైన సినిమా అని చెబుతున్నాను" అన్నారు. 

"నేను ఒక పాత్రను చేస్తుండగానే నాకు నచ్చేసిన సినిమా ఈ మధ్య కాలంలో ఇదే. 'వాల్తేరు వీరయ్య' అనే టైటిల్ తో చిరంజీవిగారు చేయడానికి సిద్ధమైనప్పుడే ఈ సినిమా హిట్. దానికి మిగతా అంశాలను జోడించారు. నా మిత్రుడు చిరంజీవిగారితో కలిసి మరోసారి యాక్ట్ చేయడం నాకు ఆనందంగా ఉంది. సంక్రాంతికి మళ్లీ మెగా హిట్ పడటం ఖాయం" అంటూ చెప్పుకొచ్చారు.